入左廠

星期一朝早，遲左出門口，係咁跑，又居然趕到尾班晨早快線，不過唔知點解無位坐。平時都坐唔滿的，居然今朝無位！

就係咁，企左大約四十五分鐘，差不多到上環。忽然間，覺得有少少暈暈地，都未黎得切反應，就咁就暈左係度。唔知過左幾耐，（應該唔會好耐掛，仲成車人）咁就醒返，見到成車人望住我，我就訓左係樓梯口。果時好想起身走人，不過又無力，仲係暈暈地。

好心的乘客讓出坐位，仲扶我坐在位上，又有好心乘客問我要我駛唔駛白花油，不過，我都無晒反應。就咁無神無氣咁坐係度，司機最後叫左白車，真係唔好意思，因為要成車人係上環落車自己轉車。司機先生仲借左佢個袋俾我當枕頭，唔該晒。 :~)

白車黎到，救護員先生居然叫我自己行上間車度，真係過份，我自己行到，就唔駛叫白車啦。跟住，佢地見我無反應，（其實係俾唔到反應）就兩個人夾左我上白車。我其實真係自己企唔到，企到我都自己走左去，唔想上白車。

就係咁，去左瑪麗醫院，一入到去急症室，救護員先生又叫我自己過床，我果一刻，真係覺得有點無奈。但個人真係無力，咁最後，都係佢地幫過床。急症室醫生，問左我幾個問題，跟住打左枝針，就走左，我開始發冷，同個護士講，（藍色衫的），無人理我，再講，先就有護士俾左張被我，我都無力自己拉張被，就咁搭住，都暖多少少，有個護士見到我咁就幫我整好張被，咁先有返少少温暖。跟住唔知過左幾耐，就被人推左入觀察病房，咁就大件事啦。

先得護士同意，打過個電話返公司，（因為驚會影響病房中的儀器，所以病房中不淮使用手提電話），跟住係咁訓，訓到十二點幾，起身，個人已經精神晒，但因為三點先有醫生巡房，最快要等到三點先走得！

成朝未食過野，觀察病房又無飯餐供應，有點肚餓，問護士，又話因為我係因為暈入院，唔可以四圍走。無飯食，仲無力。同個護士講啦，佢又目無表情咁，俾左包餅我食（唔知係唔係佢自己的私伙野呢）好彩，咁口岩有個朋友打電話黎，話搵我食飯，咁又先有人黎買飯俾我食。不過都等到二點，餓到肚扁。

真係肚餓，咩都好食，食食下，醫生黎巡房，三點鐘，又幾準時喎，即時飛返入去病房等。等左半個鐘，醫生係無乜野講的情況之下，就放左我走。

再攞埋藥，都差不多四點半，先可以離開醫院。咁就過左一日，乜都無做過，好無聊咁。