birthday dinner - 囍宴

今日係母親大人生日, 我地去左Jacky Yu 主理既私房菜.
我一早訂左枱, 佢地仲一早email 左個菜單俾我, 不過我估佢個電郵都係用send mail 係唔check 既. 因為我回覆左佢我要咩菜單, 同埋問佢地收唔收credit card, 一D 反應都無. 跟住佢打黎confirm 果陣, 又問左一次.

今日食既係$580 一位既菜單

頭盤 appetizer
清酒黄金一口鮑魚 braised abalone in Japanese soy sauce
黑松露桂花薰蛋 osmanthus smoked egg topped with truffle slices
貴妃醉蝦 drunken shrimps
瑤柱絲涼拌萬年青 conpoy shreds with choy-sum

主菜 main
金牌口水雞 Sichuan spicy chicken
金不換辣酒煮蟹 stir fried spicy crabs with basil
香茅柑桔菊花魚 chrysanthemun mandarin fish lemongrass calamansi sauce
梅子石榴 soaked guavas with dried sour plums
燕窩津梨燉土雞 Stewed chicken with pear and bird’s nest soup
脆瓜炒仙菇 Stir fried mix mushrooms with pickled cucumber

甜品 dessert
私房自家製雪糕 homemade ice-cream

食物份量比我想像中大, 鮑魚幾好食喎, 不過只係九孔鮑, 口水雞幾好, 其他都不過不失, 但個黑松露, 可能係我唔識欣賞, 我就覺得麻麻地, 好似無乜特別味道, 同埋條魚我都食唔出佢係魚, 炸到唔知食緊乜, 可能菊花魚係咁掛., 而且隻蟹唔係幾新鮮, 或者係鋪頭養左一段時間, 好瘦.

總括而言, 我覺得 overprice 左. $480 會算係一個合理價錢.

my long weekend

睇到Novotel 有個酒店連disneyland package, 好似幾抵咁. 於是星期五同I 生請左一日假. 我晨早七點幾起身, 不過因為約左agent 去睇樓, 最後二點先到.

唔知係唔係暑假既關係, 都好多人. 基本上所有野都要排隊. 我地一去到, 就去左space mountains 攞 fast pass. 嘩, fast pass 都要等到四點四十分呀.

攞左fastpass, 去左玩巴斯光年星際歷險, 原本我有五萬幾分... 點知I 生佢咁口岩打到個大佬既心臟, 成萬分一下, 無拿拿俾佢攞左廿萬, 俾佢反超前, 激死.

跟住去左玩馳車天地, 排左三十五分鐘, 仲要俾人打尖... 激死!!! 玩完, 我地去左買熱狗, 無乜味不過都OK 啦.. 叫做填飽個肚.

食飽, 跟住去左睇獅子王, 我未睇過, 有歌舞有雜技, 都幾得意.

睇完show, 又去左泰山間屋, 但點解又有piano, 又電話,又唱機, 高科技... 奇怪.

一離開, 我地就係咁跑, 好彩剛好趕到 5:40 入到fast pass 玩 space mountain. 真係趕到氣咳.

下一個節目係去睇Golden Mickey, 亞米奇老鼠打聲好鬼尖, 唔知係唔係未發育呢... 睇完show 順手去左隔離既 my little world, 無無聊聽下歌. 不過排隊果陣發生左D 好得人驚既事, 有個我估係內地既女人帶住個女, 坐係最後果行, 係度pee 喎... 幾驚呀.. 好彩我唔係坐係果架車度咋...

遊完 Little world , 跟住見仲有時間, 又去埋小熊維尼歷險之旅, 排隊中途, 有幾個我估都係內地既遊客, 係度勁打尖, 果幾個小朋友係個欄杆度, 爬黎爬去, 好似玩雜技咁...真係睇到眼火爆. 其中一個靚仔, 仲居然打我尖, 我咪罵佢囉.. 真係火滾!

如果無左呢D 咁既人就好啦... 都唔明, 排隊唔得既, 又要打尖, 都快唔到好多啦...

Anyway, 我地睇完小熊維尼歷險之旅, 就去左睡公主Castle 搵個好位睇煙花. 有埋燈火, 都幾好睇丫.

睇完晒, 都成八點半, 我地去左買左兩件t-shirt 做紀念品. 跟住就坐地鐵走去東涌食飯...

食完又去左novotel 地下個 lounge 飲野, 差不多一點, 就返酒店啦..

第二朝, 九點幾就起左身, 就係為左食個早餐!!! 哈... 不過又落雨, 無得游水... 於是去左 outlet 行下, 買左個手袋俾媽咪, 又買左個俾自己. yeah! 再加埋兩份野俾C++ BBs. :) 好多收獲!

原本諗住去大澳, 不過攞住咁多野, 又唔係好想去.. 於是坐巴士去左機場terminal 2, 睇左 UP, 仲要係4D 版! 幾好睇喎.

放星期五, 感覺真係好, 玩完兩日, 仲可以放假! 哈哈... 正!

Cambodia, I am coming ~

上年因為機票太貴去唔到, 今年再接再厲. 不過柬埔寨都真係幾熱門, CX 11 月個price list 8 月7 日先出, 我地8月9 日去check, 巳經full 左... -___-

多謝I 生, 好努力咁去call agents. 終於搵到機票... :)

期待!

Coco before Chanel

好平淡, 不過都好睇既... 但要有耐性...

Overheard - 竊聽風雲

估唔到鑽石山家陣咁旺, 好多人排隊買飛睇電影, 本來想睇hangover, 後尾見度有套劉青雲有套電影, 好似好耐無睇過港產片, 咁就轉軚睇左呢套"竊聽風雲".

個英名片名好似怪怪地, 明明講竊聽, 但片名叫 overheard. 查過yahoo dictionary, 話解"無意中聽到". 好似唔係好口岩喎...

劉青雲, 照舊的好戲, 古天樂也越來越進步了... 但唔知點解, 吳彥祖好似越來越唔掂咁喎... 唔係好交到戲. 或者係個角色無乜特別掛...

G.I. Joe

真係悶悶地... 我成日都唔係好明, 點解D 男女主角, 係D 生死關頭, 仲可能掛住咀唔走人架呢...

Burger King - Breakfast

摛日去左Burger King 食lunch, 有幾張早餐coupons, 本來諗住都唔知幾時會用.. 不過今朝架巴士好順利咁就到左美孚, 咁又好快咁又上左小巴再落車, 比平時快左成十分鐘... 為左要好好享受呢十分鐘, 我打算食一個早餐! 於是就攞住張coupon, 去左Burger King.

又見到果個職員, 佢原來唔係好識用收銀機, 我見佢係度問佢同事呢度點入果度點入.

我無理佢, 買左份牛角飽加奶茶, 個飽好新鮮好熱, 但攞到返公司, 個包濕晒...
-___- 好鬼難食.

包, 都應該係新鮮食好.

Burger King

同事K 今朝send 左個 Burger King Buy one get one free coupon 出黎, 我地即刻去左食. 十二點半去到, 好彩無乜人..

本來我地摛日黎過, 見到咁多人都唔知咩事, 仲諗住買外賣返去食, 好彩無咋... 半價喎..

今次我地又係搵個工作人員幫我地落單, 好勁喎. 快餐店有人同你落單, 仲送埋去你個位度..

不過佢地今次搞錯左張單, 無做特價, 又要再等. 我地仲係諗, 唔知會唔會好似恆生咁單野咁, 有人假扮員代收錢. 係就死啦... 果五佰蚊係我架...

當然, 最後有驚無險, 不過等左成四十五分鐘.

Cats

差D 唔記得寫... 對上一次睇係10 年前啦... 果陣係英國睇. 講真就唔係好明佢講乜... 不過D 歌幾好聽咁... D 人又幾生鬼.

今次睇, 起嘛... 明!

內容大致都差不多, 只係好似改左DD, 衣著唔同左. 今次D 衫有燈泡, 會發光.

最正都仲係落難果隻貓一個人獨唱... 好touching.

bookfair 2009

上個星期六同I 生去左書展, 本來諗住行兩個鐘就走人... 點知兩個幾行到七點... 行到腳軟.

好幾年無去書展啦, 因為平時去書局買左D 書都未睇晒, 我仲有好多書連袋都未開... waste $$. 不過I 生公司有特價買入場卷, 十蚊張, 咁又好抵咁喎... 又買左. 後尾先知有朋友有免費飛... 激死.

今次書展, 個場好大, 有三層咁多, G樓係主要展覽場地, 大型書局居多, 一樓係比較細既公司, 仲有文具, 四樓, 唔知係乜無去到. 今年大熱新聞梗係靚模出寫真啦.. 聽講佢地係四樓有簽名會, 不過我地無去到睇. 一來, 我個人無乜興趣, 二來, 行完第二層, 我巳經行到好疲 ... 如果有氣有力, 都仲話去睇下, 咁疲. 都係打道回府.

以下就係今次書展既收獲:

1. 我的低能大肚之道 - 馬仔
雖然知佢好耐之前出左本低能婚禮, 不過一直都無睇, 今次係書展無聊睇下, 有幾搞笑喎.. 好... 買左... 回家路上, 一路睇.. 一路笑到傻左.

2. upside down - 黃貫中
入書展之前, 唯一諗住買既書... 係paul 去南極既遊記. 無得去都睇下

3. 完全掌握 二級日語 - 文法
為左表示自己真係諗住考二級, 點都要買!

4. 完全掌握 一級 二級日語 - 片假名語彙
片假名一向都係我既死穴...

5. 他她牠的床 - 文地
常在yahoo 睇佢既office 四格漫畫, 都幾得意.

6. 直升機上看海嘯 - 區樂民
FANS

7. 靚湯王
勁喎... 成千款湯, 一個星期煲一款都煲廿年!!!

8. 柬埔寨

9. 名廚教做菜

10. 夏日消暑菜 - 黃淑儀

11. 唔記咩書名, 講香港奇石...

12. 都唔記叫咩名, 係日語入門

13. GOD 書展限定, 德素愽士

14. 兩本相簿既制作coupons

14 樣野合計大約一千.